Tuesday, June 14, 2011

:) عمرة

كنت فى سادسة ابتدائى لما عرفت انى هاروح المكان الجميل دا .. اول مرة هاروح طبعا ليها احساس تانى خااالص .. كل ذكرياتى عن المكان دا  .. مم ماعنديش ذكريات لانى اه اتولدت فيه لكن كان عمرى سنتين ساعتها ف طبعا لا افقه شيئا اطلااااقااا
كنت ساعتها فى سادسة ابتدائى وماعرفش هل بركة الرحلة الحلوة دى هى الى خليتنى اجيب المجموع دا ولا ايه مثلا هعهع .. المهم تقريبا سافرنا كان فى الترم التانى .. وكان فى الرحلة دى باقة من الحاجات الى اول مرة اجربها وانا عاقلة وواعية كده هعهعهع
اولا : كان اول مرة اركب طياره .. مش كنت خايفة زى اى حد كان احساس عادى يعنى ومش كان فارق معايا اقعد جنب الشباك ولا لاء اصل احنا بليل والدنيا اسود عتمه هاشوف ايه يعنى . ركبت وقعدت وفى النص كأنه عنداّ فيا مثلا هعهع .. طلعت الطيارة وككنت حاسه نفسى بتزحلق على ورا وبتزحلق لحد ما كنت هاركب على حجر الى قاعد ورايا نياهاهاها بس ساعتها الطيارة اتعدلت وقالوا فكوا الاحزمة .. مش فكرت فى حكاية انى انام دى بس قعدت العب شوية فى السكرين الى بتبقى قدامنا .. وبعديها جت المضيفة وتقريبا كده مش فاكرة جنسيتها بس هى اعتقد كانت حاجة من اسيا هيهيهي .. اديتنى بوكس كده بيدوه للاطفال ( اه اوومال مانا كان منظرى عيالى اوى ) البوكس دا انا فاكراه كويس .. كان فيه شوكولاتة وعصير وشيبسى وكراسة تلوين والوان شمع .. كان حلو والله وكان عاجبنى .. المهم خلاص قالوا هاننزل دلوقتى اربطوا الاحزمة وبصوا من الشبابيك .. لقيت منظر بجد مش قادرة انساه .. المدينة منورة من فوق .. ياااااه متخلين كده انك فى وسط ضلمة واسود وعتمه وفجأة كتلة كده من النور بتظهر قلت ساعتها سبحان الله .. نزلنا ووصلنا و كنا فى المطار مش فكرة ان منظره كان ملفت اوى بس اهو اكيد احسن من بتاع مصر وانظف بلا شك هعهعهعهع .. ركبنا الاتوبيس ورحنا على مسجد كده عشان الاحرام وانا الحمد لله بلا فخر كنت لايصة اخر حاجة مش عارفة اعمل حاجة ولا اقول ايه ولا اصلى ازاى صلاة الاحرام دى .. عاملة زى الاطفال الى لسه بيتعلموا صلاة الصبح هيهيهي صلينا ورحنا على الفندق . كان حلو والله وجميل طلعنا وكان ساعتها قرب صلاة الفجر الى هو يادوب نلحقهها .. الفندق كان قريب من الحرم نزلنا بسرعة وروحنا وكانت الصدمة والذهوول .. منظر الحرم النبوى بجد مش قادرة انسى منظرى اول ما شوفته وتنحت فى جمااااااااااااله وقلت يا الله .. اد ايه كان جمييل بجد فرحت اووووى ان اول منظر اشوفه كان هو .. المهم دخلنا وصلينا الفجر وكان وقت جمييل اوى .. ساعتها اتعلمت حاجة جديدة خاالص والى كان مفروض اعرفه انى لازم اتعود على الحاجة دى كل يوم تقريبا .. " صلاة الجنازة " الى فهمته يعنى انه اى حد بيموت فى السعودية كلها لازم يتصلى عليه فى الحرم .. ف كان بعد كل صلاة يقول الامام " الصلاة على ميت يرحمكم الله " ومش مرة واحده دا كان اكتر من مرة بعد كل صلاة تقريبا .. اتعلمت ازاى اصليها .. بعد الفجر بقى فى المدينة دا حاجة تانية خااالص خاالص .. تطلع من المسجد تلاقى الشارع كله اصلا ما شاء الله ريحته مسك جميلة من المحلات واصحاب المحلات بدأوا يفتحوا والدنيالسه بتنور كده تحبى تخرجى جدا فى الوقت دااا .. .. الى ماكنتش اعرفه بقى انى لما انزل اصلى الظهر هاتشوى وانا رايحة .. اصل الجو هناك نار نار يعنى ..والعبايات السوده بقى ماقولكوش عللى بتعمله فى الحر دا يااااااانااا .. اه صحيح نسيت اقولكوا انى بردو ولاول مرة فى حياتى البس عباية سوده وكنت مستغربة نفسى اوى الصراحة بس احساس حلو انك " الحاجة سولى " هعهعهع .. المهم الضهرية دى كان الجو اوه لالوووو بصراحة .. مايتمشيش فى الشارع .. يادوبك تاخديها جرى لحد الحرم عشان مش تتسلقى .. واحساس بقى اييه لما تخشى فى التكيف جوه كده الله الله .. جميييييييييييييييل .. قررنا اننا هانزور الروضة عشان اسلم على الرسول صلى الله عليه وسلم وابلغله سلام كل الى قالولى اسلم عليه .. كنت فاكرة بقى انى هاخد راحتى واصلى براحتى واكلمه وامشى فى سلام لكن ماكنتش اعرف الى هايحصل ان ان اااان ... دى كانت معركة حسبى الله ونعم الوكيل والله .. عندهم تميز هناك اوى بين الستات والرجالة .. الروضة بتبقى مفتوحة للرجالة طول اليوم لكن الستات معادين بس وبيبقوا زحمة اووووووووووووووووووووووى اووى .. فضلنا واقفين فى الطابوور كتيير كتيير يعنى وكنت بتخنق يمعنى بتخنق مافيش هوا وكان فى ست ماليزية كده واقفة بتهوى عليا هاهاهاها .. دخلنا ومش عرفت اصلى للاسف :( اتكلمت كده بس وخلاص .. بس فعلا كانت حاجة فى منتهى الهمجية من كل الجنسيات تدافع وعدم احترام للمكان الى هما فيه وحاجة تقرف .. وانا لما دخلت جوه بقى كنت بموت رسمى فعلا .. .. مافيش هوا وانا بتخنق والناس عمالة تهوى عليا لدرجة ان فى واحدة عسل كده اديتنى موزة هععهعهعهعهع مش عارفة اعمل ايه باموزة وانا بتخنق بس كتر خيرها ماقصرتش هههههههه .. المهم خلصنا من المعركة دى على خييير وتقريبا مش فاكرة حاجة اكتر من كده فى المدينة

رحنا مكة وبصراحة مش حبتها خاالص زى المدينة .. الناس هناك مش كويسين اوى زى هناك والجو احر واحر والفنادق يا فوق اووى زى الانتركونتنتال .. يا تحت اووووووى زى فندق رمسيس .. حاجة يععع .. ومش كنت مبسوطة خاالص كل الى مصبرنى انى هازور الكعبة .. كانت جميلة اوى ولفيت حواليها وحاولت بكل قدراتى اشوف الحجر الاسود بس طبعا ولا عرفت المح طرطوفة منه اصلا هعهعهع .. بس كانت اكتر حاجة حلوة .. صليت فى الحته الصوغننة الى بتبقى قدام الكعبة دى .. الربع دايرة .. كانت حلوة اوى ولمست كسوة الكعبة بأيدى وريحة المسك فضلت فى ايديى مارحتش غير بعديها بكتييييييير اوى .. كانت جميييلة بجد .. ومن اجمل الحاجات الى حبتها هناك بردو .. حمام الحرم كان جميل اوى اكلته حبوب كده .. وكان فى ريشة واقعة من واحده منهم اخدتها ولسه محتفظة بيها وميه زمزم بققققى ياااااااااااااه مش كنت بشبع منها كل شوية اشرب ..
 فاكرة انى وانا فى المدينة حصلتلى حاجة غريبة اوى .. انى وانا ببص على منظر كده من فوق فى الحرم المنظر دا كان مكبوع فى خيالى كأنى شوفته امبارح .. وكنت متأكده انى شفته قبل كده يعنى شفته ازاااى وانا كان عندى سنة او سنتين ساعتها ماعرفش بس شفته سبحااان الله

مش فاكرة تفاصيل اكتر من كده اوى بس فعلا فعلا .. ربنا يرزقكم كلكم بزيارة للرحلة الجميلة دى .. وانا معاكوا تانى يااارب :):)..

2 comments:

  1. فعلا ناس المدينة احلي كتير من مكة..عقبال ماتروحي تاني

    ReplyDelete
  2. يااااااااااااااااارب .. وانتى معايا ان شاء الله :)

    ReplyDelete