سولى تحلم !

يهمنى حلمى البرىء مهما يكون" "
الجملة دى من وقت قريب بقت تقريبا شعارى فى حياتى .. انها مهما كنت عايزة ومهما كان بسيط وممكن الناس يتريئوا عليه .. قررت انى مش هابص لحد ممكن يقول ايه على كده وانى هاههتم باللى انا عايزاه دا غصب عن اى حد :
قعدت مع نفسى كده ادعبس وادور فى اعماق اعماق ومعاميع قلبى ادور ايه هو حلمى البرىء ؟؟؟!!!
لقيت انى عندى احلاااااااااااااااااااااااااااااااااام بس ياااه كانت فين دى كلها .. معقولة يا بت يا سوسى كنت مخبية دا جواكى طول الوقت المهم يعنى .. لو احلامى من الناحية العملية : ( شغل يعنى من غير فذلكة ) كان من وانا صغيرة بيراودنى حلم كده نظرا لاهتمامى بشىء معين الا وهو البيئة .. ف كنت قد قررت انى ليه مبقاش " سعاده معالى وزيرة البيئة " وايه المانع يعنى .. اقل منى ايه الى اتعينوا قبل كده .. شوية مذاكره بجد وابحاث  وكوبايتين نسكافيه بلاك وكلوا يبقى تمام ... والغريب بقى انى لقيت الناس مشجعنى على كده جدا وبيقنعونى انها وظيفة لايقة عليا .. على عكس المتوقع يعنى !!
كبرت شوية وكبر مقاس حلمى معايا .. اكتشفت من فترة مش بعيده اوى انى بعرف ارسم مثلا واكتب حاجات .. مش كنت اعرف انى ممكن يبقى عندى الاهتمام لهواية زى كده ومش كنت اعرف بردو انو مع كتر الممارسة هاتحسن كتير فى الموضوع دا .. المهم بقيت بكبر وفى نفس الوقت بتكبر الهواية دى معايا .. لحد ما فى يوم كده اذ انه قررت قرارا واصدرت بيااانا هااااما
سوووووووووووووولى عايزة تتطلع صحفية او كاتبة يا جودعاااان .. وايه المشكلة بردو .. اى كاتب بدأ مش شوية ورق بيكتب فيه اى حاجة لحد ما بقى بيألف كتب ودواوييييين .. وبصراحة الشغلانة دى لقيت الى يشجعنى عليها كتييييير ولولا الهواية دى ماكنش زمان فى البلوج دا ولا كنت زمانى بكتب دلوقتى النوت دى .. المهم
قعدت افكر شوية بما انى خلاص داخلة على تانية ثانوى اهو وكلها تكه ولازم اقرر مستقبلى هعهعهعهعهع قال يعنى الشغل مقطع بعضه .. قلت ما اخش ادبى واطلع كاتبة او صحفية زى مانا عايزة بس قالوالى لاء .. خشى علمى مع انى شايفة ان الادبة جمييييل والله .. بس لقيت انه يقرف مع واحده زييى .. واصدرت البيان التالى
سوووسى هاتخش علمى يا جودعااااااااااااااااااااااااااان . طب علمى ايه دا .. انا مش عايزة اى كلية من كلياته لاءااااا هاعمل ايه .. لحد ما نزل عليا الالهام فجأة وبردو اصدرت قراااار ( بقيت بصدر بيانات اكتر من المجلس العسكرى نفسه هعهعهعهع ) قررت سوووسى انها عايزةتتطلع زى الى عمرها ما حبتهم فى حياتها اطلاقا بتااااتاااااا .. داكتووورة اسناااااان حسيت انه ايه المشكلة يعنى .. مافرقتش كتير طب عادى من طب اسنان واهو بلوة اخف من بلوة .. بس فوجئت بحاجة عجبتنى جدا جدا جدا وجت فى الجون بصراحة
د.شريف عرفه
( عارفينه دا الكاتب ابو نضارة الحلو دا ) قعدت اتسائل عن حرف الدال الى قبل اسمه دا بيبعبر عن ايه يعنى وهو اصلا كاتب ومحاضر ورسام كاريكاتير .. فاكتشفت شىء الا وهو انه دكتور اسناااان ( نياهاهاهاهاهاهاها ) هو انا هاطلع زييه ولا ايه .. دا السؤال الى سألته لنفسى ساعتها .. بس لقيت ان دى فرصتى .. اخش الكلية الى انا عاوزاها وفى نفس ذات الوقت كهواية اعمل الى انا بحبه .. الله الله دا ايه الجمال دا .. حلم جمييل صح .. بس الى عنده العزيمة يحقق بقى مع شوية محبطين للهم والعزائم متنطورين حواليه ( ايه الى انا بقوله دا ) ما علينا .. الصراحة يعنى هو دا كان حلمى البرىء فى الشغل .. نتتقل الى الجزء الاهم الى ممكن الاقى الف واحد بيقولى ما لسه بدرى يا قطة على اكلام دا مستعجلة ليييييه .. ( عرفتوا طبعا هاتكلم فى ايه) فيها ايه لما احدد مواصفات فتى احلامى من دلوقتى .. عيب ولا حراام
. بصراحة الموضوع دا ماخدش منى تفكير زى ما اخد موضوع الشغل دا .. بس اهو يعنى الواحد بيحط خطوط لنفسه من دلوقتى علشان ما يتصدمش الصدمة الكبيرة لما يواجه الواقع .. اهو يعيش قصة حب فى خياله قبل ما يقابل مجتمع الوحوش الى بره دا الى مش هايلاقى فيه واحد متفصل زى ما كان هو عايز بس ممكن .. للى عنده دماغ يدور
المهم .. مش هاقول عايزاه امير جايلى بحمارته البيضة ياخدنى نتفسح فى الحقول والمروج الوسعه والهبلولى دا لا انا حلمى ابسط من كده خااالص
كل الى انا عايزاه انه اولا يكون بيحبنى او هايحبنى او حبنى المهم ما يكونش واخدنى تخليص حق مع اهله يعنى هعهعهع .. عايزاه يراعى ربنا فيا ويعيشنى اميرة .. مش بفلوسه ولا الهبل دا لا بكلامه واهتمامه بيا .. حتى لو مش هايقدر يحققلى كل حاجة انا عايزاها بس يحسسنى انه بيعمل المستحيل علشان يحققهالى وانا هاكون مقدرة دا اوى اوى .. يكون حنيين ( عادى لسه فى ناس حنينه مش تخافوا ) حنين بكلامه بأفعاله بتصرفاته .. يكون اهله بيحبونى هعهعهعهع .. مش عايزاه يتبهدل ما بينى وما بينهم لمجرد انهم مش طايقينى .. وانا على اقد ماقدر اكيد هاخلى اهلى يحبوه ... ابدا ابدا عمره ما يزعلنى ( حد هايقولى مستحيل طبعا ) وانا عارفه كده بس في دماغى حاجة مش عارفة اوصفها بالنسبة للموضوع دا .. على فكرة يعنى مش شرط يكون توم كروز ولا براد بيت فى جمالهم يعنى .. بس بردو مايكونش شعبان عبد الرحيم .. عايزاه وسط ولو انا حبيته عمر ما هايكون الشكل دا حاجة مهمة اكيد ( دخلنا فى المعمعه اهو ) نفسى يبقى ليه علامته المميزة فى حياتى كده .. نفسى يكون هو الى بجد ادعى من كل قلبى ان ربنا يجعلنى معاه فى الجنه .. فى اجمل من كده نفسى يكون واحد مابيفكرش لا فى شكلى ولا فى ملامحى اكتر ما بيفكر فى انا جميلة من جوا ولا لاء ؟؟ مل اخر عايزة واحده مش عارفه هلاقيه ولا لاء .. لما يجى يتقدملى مش عايزاه يعملى مفاجأت بقى وافراح وطبل وهبولى علشان يفاجئنى .. هو الصراحة اه دى حاجة رومانسية جدااا .. بس هو لو جابلى الدبله كده واداهانى فى ايدى من غير ما يقول اى حاجة دى عندى بالدنيا كلها
سيحتكوا انا صح .. وبصراحة هاتضايق اوى لو حد قالى انتى لسه صغيرة على الكلام دا !! ف ماحدش يحاول يقول بعد اذنكوا ( ديموقراطية انا ) ههعهعهعهع ..
خلصنا من الشغل ومن الموضوع اياه دا .. تخش فى اخر حاجة وبصراحة ممكن تكون اهم حاجة .. انا اتخلقت ليييييه ؟؟ هاعمل ايه لدينى او لوطنى او لمجتمعى تفيده .. حاجة اقابل بيها ربنا يوم القيامة واقوله يا رب انا عملت كذا !! لحد دلوقتى مش عرفت ايه هى الحاجة دى بس بدعى ان ربنا يوفقنى انى الاقيها واعملها كمااان ( قولوا ياااارب ) واخيرا اهم حلم واكبر حلم واعظم حلم ممكن الواحد يحلم بيه
" رضاك يا رب " تخيلوا لما حد ربنا يرضى عليه كده .. بقعد افكر اووى فى اسامى الصحابة وهى فى اخرها كلمة عظيمة اوى .. رضى الله عنه وارضاه .. قد ايه الناس دى عظيمة جدا لدرجة انه تبقى معروفة بين النناس فلان الفلانى الى ربنا رضى عليه وكمان ارضاه  .. بجد نعمة عظييييييييييييمة اوى .. ربنا ما يحرمنا منها .. تخيل لما تقابل ربنا يوم القيامه وتلاقى انك عملت حاجة بسيطة اوى فى حياتك خلت ربنا يرضى عنك .. طبعا مش كليا وطبعا عمرنا ما هانوصل لمكانة الصحابة بس ربنا رضى عنك .. دى حاجة ماتتوصفش ..

طولت اوى صح ..( اكيد فى حد دلوقتى بيقول دا مش حلم برىء ولا نيله دا حلم مطول اوى ) بس بلنسبة لى هايفضل حلم لحد ماموت .. وانا قررت انى مش هاموت ناقصة حلم ان شاء الله !! طول مانا عايشة هاحاول احقق واعمل الى انا عايزاه .. قوينى يارب :)))
وبث

*solly *