ناس جوا دنيتك :)

كان فى جملة كده بحبها اوى بس للاسف مش فاكراها ^_^ كانت بتقول
ناس بتدخل دنيتك تفرحك وناس تانية تدخل تجرحك .. ناس تدخل وانت متأكد انهم خارجين وناس تانية قاعدين فى القلب خالدين .. واكتر ناس بتبقى فاكر انهم طالعين بيفضلوا قاعيدن فى القلب ومربعين . وناس تانية بيروحلوهم الحنين ..... ومش فاكرة بعد كده ^___^
الجملة دى مافهمتش معناها الا لما شفت انواع الناس دول فى حياتى ... فى منهم الى دخل قهرا واجبارا ومش هايطلع .. فى منهم الى كان بكامل اختيارى واختار انه يطلع .. فى منهم الى اخترته واختارنى وقاعد فى القلب مستربع .. فى منهم الى دخل لكن ربنا شاء انه يخرج .. على مكان تااانى بتمنى يكون احسن بكتيير :))
فى الى دخل وطلع بس بردو لسه بيروحلوا الحنين ... فى الى لسه مادخلش وبتمنى انه يدخل ومش يطلع ابدااااا .. فى نوعية دخلت لكن مش بختيارى وعمر ما هايكون ليها مكان فى قلبى .. بعتبرهم على دكة الاحتياطى ... وناس تانية بقى ماهما عمله مش هايطلعوا يعنى مش هايطلعوا ^_^

فى الى لسه بيحاول يدخل .. فى الى قلبى لسه موقفه برا لحد ما يتأكد اذا كان يدخل ولا لاء .. ونااااس نااااس نااااس ولسه قلبى هايشوف من دول كتييييير

لكن عرفت حاجة مهمة اوووى فى حياتى .. ان اى شخص مهما كان دخل حياتى سواء كان بإرادتى او لاء .. سواء حبيته او مش حبيته .... لازم يكون ساب اثر فى حياتى
علمنى حاجة جديده مثلا .. كرهنى فى تصرف غلط بعمله .. صححلى مفهوم عندى .. شجعنى على حاجة .. حببنى فى حاجة كويسة .. حتى الناس الوحشين بيسيبوا اثر وراهم .. علمونى درس انى مثلا ماثقش فى حد ماعرفوش بقالى كتير .. وهكذا

" لا تتعب نفسك بالبقاء فى قوب الناس فى هى ليست الجنه " الجملة دى انا بصراحة مش مقتنعه بيها اوى ... لان فى ناس حبهم ليك هو الجنة فى الدنيا :))
فى ناس قادرة تخلى دنيتك دى برغم كل الهم والتعاسة والقلق الى فيها .. قادرة تقلبهالك فرح وحب وسعاده .. بكلمة حلوة بنظرة حنينه بتصرف يخليك تعرف ان قلبك ماغلطش لما دخل الشخص دا جواه ...
لكن بردو بطبيعة الحال لما يكون فى حاجة لازم يكون فيه عكسها .. الى قدر يخلى دنيتك جنه .. صدقنى مش هاتلاقى الى يخليهالك ناار ...
مهما كان الشخص دا وحش وقاسى مافيهوش مشاعر ..ومضايقك دايما .. عمره ما هايوصلك انك تقول انه قلب حياتك جحيم .. مافيش بشر كده اصلا .. ربنا خلقنا اه فينا الحلو وفينا الوحش ... لكن حتى اوحش وحش فيه ولو على الاقل صفة واحدة بس خلته بشر :)

يعنى اى حد فى نظرك دا شرير وقاسى ومش عنده احساس وقاتل وكل صفة وحشة تتخيلها .. شوفوا فى موقف مثلا ان حد عزيز عليه بيموت .. هاتموت جواه كل المشاعر دى ومش هايظهر ساعتها غير الطيبة والحنيه الى كانت مستخبية جواته ...
ربنا خلق كل واحد فينا والخير والشر جواه .. فى ناس الخير جواها من كتره الناس بقت بتفتكر انه مافيش فى قلبه ذرة شر .. وناس من كتر الشر الى جواها بننسى انه بشر واكيد بردو جواه خير
دور فى الناس على الحلو فيهم وحبه مش تتطلع فى كل صفاته المش كويسة وتقول دا واحد مش كويس ..

وفى بقى درس تانى اتعملته .. ان حياتك هاتلاقى فيها نااس عمر ما حياتك كان هايكون ليها معنى من غيرهم .. هاتلاقى كده فى صاحب قريب منك ... فى اخ بيخاف عليك .. فى ام واب حياتهم كلها علشانك انت .. فى حبيب مش عايز حاجة غير انه يسعدك .. فى زميل عايزلك الخير .. واحسن ناس بتسعدك .. هما الى عمرك ماتخيلت انهم ممكن يكون فى مكان ليهم فى قلبك :)

فتش فى قلبك دور على الناس المستخبية جوا .. شوف مين الى ركنته جوا اوى ونسيته .. شوف مين الى لسه على دكة الاحتياطى .. شوف مين الى يستهال طرد .. بص على الى لسه واقفين على الباب بره ودخلهم .. خلى بالك من الى جوه واوعى تخرجهم .. جدد قلبك للى بتحبهم .. فضى مكان لناس تانين غير الى طردتهم .. اوحش واحد هاتقابله فى حياتك بص فى قلبه على الى مستخبى جواه .. هاتلاقى كتيير وكتيير من الخير الى عمرك ما كنت متوقع انك تلاقاه .. الناس مش وحشيين .. والله طيبين .. احنا بس الى مصرين .. مانلاقيش فى الناس غير القسوة وننسى الحنين

دور على الى غير فى شخصيتك .. دور الى بتدعى وتقول يارب اجمعنى بيه فى جنتك .. دور على الحبيب الى عمره ما هايحب حد غير حضرتك .. دور على الصاحب الى بجد .. دور ودور
تانى هاتلاقى كتيييير .. فى ناس لسه قلبها ابيض واصيل ..


مل اخر يعنى .. دور كويس فى الناس الى جوا دنيتك .. ومش هاتسيبك حتى فى اخرتك :))

رمضان :))

رمضان دا شهر مختلف بكل معنى الكلمة .. احساس تانى دنيا تانية وشعور جدييييد عمرك ما تحسه ...
عارف يعنى ايه رمضان .. يعنى النزول ساعة العشاء علشان التراويح والدنيا كلها فوانيس منورالك طريقك وانت ماشى .. يعنى عزومة الفطار الى يتنسيش وعلى قد ما الاكل بيكون كتييير على قد ما بتبقى احلى حاجة اللمة مع الى بتحبهم .. يعنى التراويح فى المسجد الى مابتحاولش تفوتها يوم وتزعل لو فاتتك ... يعنى لهفتك اوووى لأدان المغرب علشان بتموت من العطش بس جواااك بتقول علشانك يارب ... يعنى الابتسامة الى بترسمها على وشك لاى حد معدى قدامك بس علشان تاخد اجره :)
يعنى كلمة اميييييييين وانت بتقولها من كل قلبك على الدعاء الى بتسمعه من اى حد غلبان بتديله صدقة .. ومش اى دعااء دا دعاء من القلب .. يعنى القران الى بتحاول تختمه واحساسك بالفخر لما تبقى ختمته ... يعنى الطفل الصغير الى بيكون فى قمة فخره وشعوره بالعزة علشان صام لحد الظهر من غير ما ياكل ... يعنى الكنافة والقطايف بعد الفطار طعم تاااانى فى رمضان ... يعنى جريك قبل الفجر على ازازة الميه تشربها كلها فى بق على امل انك مش تعطش تانى يوم وبردو بتعطش :))
يعنى تقعد تكلم ربنا بليل كده لوحدك وتطلع كل الى فى قلبك وتختم كلامك بقولك يااااااااااااارب استجب .. واحساسك بالرضا والفرحة لما ربنا يستجيب :)
يعنى البنوتة الصغيرة القمر الى رايحة مع مامتها الصلاة وهى لابسة الطرحة على بدى كت ... يعنى الطفل الصوغنون الى اول مرة يلبس جلابية ويروح المسجد مع باباه ويقعد يقلده وهو بيصلى :)
يعنى طبق الأكل الى بيفضل رايح جاى على ما بين اتنين جيران مش حد راضى يرجعه فاضى للتانى ..
يعنى المسحراتى وطبتله واصحى يا نااااااايم .. يعنى الاطفال ولهفتهم وهما بيعلقوا الزينة فى الشوارع وفى البلكونات .. يعنى الأم المصرية الى بتفضل واقفة على رجلها طول النهار علشان بس تعمل اكلة جميلة لاسرتها
يعنى المصلية الى بتصلى عليها وتسرح فى رسمة الكعبة الى عليها وتقول يا رب امتى اروح .. يعنى السبحة الى فى ايد الراجل العجوز الى من كتر ما سبح ربنا بيها مابقاش بيعد .. يعنى موائد الرحمان الى فى كل شارع ودعوة صاحبها ان ربنا ينوله اجر اى حد فطر عنده ... يعنى وجودك فى الشارع ساعة المغرب وتلاقى ناس واقفة على رجلها مش فطرت لسه بس علشان يدوك بلاحية او كوباية مية تفطر بيها .. يعنى عصير قمر الدين والتمر الهندى والعرق سوس الى الناس بتستناهم من رمضان ل رمضان .. يعنى ليلة القدر والمساجد كلها مافيهاش مكان لخرم ابره .. كله واقف بختلاف شكله ومستواه مش هدفة غير حاجة واحدة بس .. رضاك يارب .. يعنى لبس العيد الى بتنزل يوم الوقفة متحروس علي شراه علشان مش لحقت لسه .. يعنى كل سنة وانت طيب الى بتلاقى واحد ولا عمرك شفته فى حياتك بيقولهالك ومن قلبه بجد .. يعنى الطفل الفطران وصحابه يقعدوا يقولوا يا فاطر رمضان يا خاسر دينك قطتنا السوداء هاتقطع مصارينك هععععععع .. يعنى الام الى بتدى لابنها فلوس علشان تشجعه بس يصوم لحد ما يتعود .. يعنى الكولدير الى انا بقيت بغطيه وانا صايمة علشان منظره جارح للمشاعر اوى فى الصيام :)))  ... يعنى من الاخر رمضان فى مصر مش اى رمضان .. شهر بالسنة كلها الى اول ما بيخلص بتدعى ربنا يبلغك رمضان بتاع السنة الجاية .. يعنى رمضان .. انا بجد بحبك يا شهر الغفران ..
:))))